D Wahl isch umme, d Schlacht isch gschlaage die ainte fyyre, die andere klaage. Es het d Frau Schiavi gar kai Brot gha, Me wott e Ma und nit meh root ha.

Doch Carlo, du kunnsch schnäll uff d Wält, wenn s Stimmvolgg morn scho kläfft und bällt,

Au s Wohnumfäld, wo d SVP am liebschte hät vergammlet gseh, darf d Barbara jetz scheener gschtalte und d Grossreet derfe d Skepsis bhalte.

Die kemme aber no uff d Wält: Jetz wird gschafft, jetz hämmer Gäld.

Au de Beamte sait me "Tschau", die sinn jetz fascht wie andri au. Die Iesig het au drum e Spitz: sy killt, y hoff, d Beamtewitz!

Wenn ys dr Näggscht entgege schällt, isch klar: Legände bruucht die Wält.

Dr Hanselmaa maint, ass das Muet isch, wenn d saisch, ass s neye Logo guet isch. Und dr Pius haigi gsait, ass Basel sone Farb verdrait.

Mir sage: Drämmler, jetz hett s gschällt, so kemmet Ihr denn nit uff d Wält.

Wottsch als Regierig naime spaare, fahrsch irgend aim ganz gwiss an Kaare, dä wott sy Pfrinde fescht bewahre vo dr Wiege bis zer Bahre.

Und fählt dr fir dr Staatssarg s Gäld, kunnsch no bim Stärbe bees uff d Wält.

Es ruesst und fägt, s isch kuum zem fasse, dr Urschrey schreyt dur alli Gasse. Tout Bâle isch do in ganze Masse, Kai Mensch wott soone Flop verpasse.

Am zwelfi z Nacht kunnsch denn uff d Wält: Statt Urschrey het s nur zwelfi gschällt.

Wenn d Sprayer nit dehaime blyybe, dät s Rychi us dr Stadt verdryybe, het au dr Moritz Suter dänggt und Basel Antispraygäld gschänggt.

Doch putzisch hitte mit vyyl Gäld, kunnt morn e Sprayer meh uff d Wält.

D SP, wo fascht Amok lauft, will me dr Staat schyynt s usverkauft, merggt s wie die Griene laider zspoot: s sinn d Fraue im Regierigsroot.

Was mainsch, wenn erscht no d Quote stimmt - denn kunnsch uff d Wält! Hesch richtig gstimmt?

Eyri Basler Roothuus - Naarre