Wenns am Mändig vieri schloot
herrscht Aadrang bim Regierigsroot.
Do kemme Gescht vo no und färn,
vo Lörrach, Ziri und us Bärn.

Vo Neueburg die ganz Regierig
kunnt unter präsidialer Fierig
zem s Basler Artepläschlli z gsee.
Do frait sich s Fasnachts-Comité!

Dr Bundespresi wär gärn ko,
doch het er Buuchwee iberko.
Är losst sich dorum gärn verdrätte
vom Swiss-Presidänt - dasch au e Nätte.

*****

S Motto, das isch schwach:
En Arteblaasch im Bach.
So sait e Ratte zumene Mysli:
Vyl lieber isch mir s Rhybadhysli.

D Arteblaasch im Rhy
losch drum lieber sy.
Vyl scheener wärs, me fänd e Wäg
zem ändlig z baue dä Minschterstäg.

S Gricht sait, s will en nit,
dä Wäg syg gar kai Hit.
S haigi deert nie e Stägli gha,
drum miess me das au hit nit haa.

S Gricht het soo uns gleert:
s Beamtetum keert geert.
S bescht syg: s blybi alles soo,
wie s gsi isch, s kennt sunscht jede koo.

So goot s Nju Pöblig Mänädschmänd
vor em Aafoo kläglig z Änd.
S Gricht sait, was d Bevölggrig wott -
dasch kundefrindlig, saperlott!

Z Basel am mym Rhy
schwätzt halt au jede dry.
Jede maint grad nummen är,
wissy drum, was richtig wär.

Doch wenns vieri schloot
jede Fruscht vergoot
denne stöömer alli y
numme das ka richtig sy.

D Regierig sälber winscht drum alle
au däne , wo sy nit duet gfalle:
Schöni Fasnacht, händs freelig und glatt
und gniesset s Läbe in unserer Stadt.