Was ys e bitz mit Sorg erfillt,
isch ass das nit fir alli gilt.
So heert me uff em Märtplatz munggle
d Regierig dabbi glych im Dunkle.

So lott dr Presidänt verlutte,
är wurdi halt vyl lieber schutte,
als kulturell sich z engagiere
und jede Zyschdig go regiere.

Dr Jögge dä regiert no gärn.
Doch miecht er das am liebschte z Bärn,
maine ämmel d Mediegleen,
wo sowysoo nie duure gseen.

Dr Vischer dä gseets sunneglar
sy Uffgob doo isch undankbar.
Är muess zerscht Styrgschängg iberbringe
und denn dr Bättelstab go schwinge.

Do hets dr HaMaTschu persee
bibbelilycht zem duure z gsee.
Är het e Heer vo nit ganz roote
Expärte, wo ihn dien beroote.

Dr Lewin het bim duure gsee
E Handicap villicht au mee:
Är zabblet soo, wenn är regiert,
ass s Ziel är us em Aug verliert.

Dr Frau vom Bau dien ganzi Schaare
liebend gärn an Kaare faare.
Nur haisst das, ass ihr s rächt versteen
nit, ass die besser duure gseen.

Im Spittel het s vyl Apperät
duure gseesch mit Röntgegrät.
Numme waiss dr Conti nit,
wievyl vo dääne Grät s deert git.

D Schryberling vo dääne Siibe
hänn sich mänggmool scho verschriibe,
will sy, was gschwätzt wird, nit versteen
und dorum au nit duure gseen.