Mediemittailig us em Roothuuskäller
MedienmitteilungStaatskanzlei
Roothuuskäller-Värsli-Sammelsurium -- Wenn s am Mändig vieri schloht\\ isch s zem Dichte e glai spoot.\\ Mer wintsche aber sinn so guet\\ Ass niemerd s friehner verwände duet.
Em Hakan Yakin hätt is guet do,
är hätt ganz aifach nur dr Huet gno
und nit no s Muul so fescht verrisse
denn wurd me ihn villicht vermisse.
Do het s dr Barth scho besser gmacht:
isch still verschwunde iber Nacht.
Doch au dr Barth duet kain vermisse
Dä het drum alli zue fescht bschisse.
D Regierige hänn heftig gstritte,
fascht hätti d Partnerschaft dra glitte;
doch alles isch, wie s gsi isch bliibe
meh z erwarte, wär au ibertriibe.
Es nämme gwissi Lyt nit fuul
Im Grosse Root kai Blatt vors Muul
Drum kasch jetzt bii dr SVP
Dr Spaltpilz sichtbar waggse gseh.
Zum Motto Blatt vors Muul han ych no dänggt,
ob äggscht bi jedem ai Blatt länggt?
Firs Myli vo dr Calmy-Rey
bruucht s sicher ains Format A3.
S Dichte will mer hit nit glinge.
Die Värs sinn schlächt und nit zem singe
D Pointe sinn ganz bsunders mys.
Y mäld my aa bim Schnabelprys.
Zem Schluss dien mir dr Gwunder stille
und de Top Secret ihre Wunsch erfille.
Sy hänn uff die Antwort jo lang miesse blange:
Doch mir dien Ihri Frind us Oman empfange!
Hinweise
Am Fasnachtszyschdig am Morge am elfi zaige d Frind vo de Top Secret us Oman ihri grandiosi Show uff em Märtplatz. Nochhär dien die grau Zivil-Regierig und die bunte Veegel vo dr Fasnachts-Regierig die Grubbe us Oman gmainsam im Hof vom Roothuus offiziell und fasnächtlig empfange. S wär scheen, wenn au vyli Fasnächtlere und Fasnächtler ihri Offehait mit ihrer Presänz wurde under Bewyys stelle.
