Am Maischte het s dr Lewin droffe,
dä isch grad mehrfach ins offsaid gloffe
är griegt vom Grossroot barsch serviert
dr Harti Meier wurd zwenig hart gfiehrt
är haig bi der Siemens voll Vertraue
lo halbkabutti Combino baue,
und well no vom arme FCB
fürs CombiTicket Bargäld gseh.

Im Eymann isch es besser gloffe
dä het sich mit em Wüthrich droffe,
het Fachhochschuel uff d Schiine brocht
und au sunscht bim Partner uff Partnerschaft pocht.

Dr Conti gseht mi syt de Wahle
Im Zwyyfel nomeh ummestrahle.
Dank däm Lache isch s schwäär z verroote,
ob au är isch nääbe d Schiine groote.

Dr Vischer het uff syni Art
konsequänt und sehr apart
guet regiert und trotzdäm gspaart.
E naime numme spaart er nie,
denn s langsam fahre macht em Mieh;
so zahlt er Buesse halt wie wild
de Schuggermysli vom Jögge Schild

Jetzt isch dä Vischer nimme doo
är het sälber welle go.
Dr Wunderli het druff irritiert
sy PUK-Kanone neu justiert
und schiesst sich uff dr Müller y:
Jetzt isch au dä halt nimm drby.

S het pletzlig au dr Tschudi nimm welle
vo sym Zingli an dr Woog verzelle;
vo syner Partei, wo alles brobiert,
ass me nie ka wisse, mit wäm sy marschiert.
Dr Hamatschu mit starkem T
het dr Erfolg ganz schlicht nimm gseh
und d Fachlyt, won är gärn zitiert,
hänn gmaint, es wäri duuregschtiert;
är soll uffs Härz und d Frau jetzt loose
dr zwaiti Wahlgang gieng sicher in d Hoose.

S Blaui Huus wird druff ab grien,
will Grieni deert jetzt regiere dien.
Die sinn so naiv und unbedarft kiehn,
die maine partout, ass mir jetz nimm mien,
die Zollfreji baue im Wiisegrien.

Das käämt au dr Baudirektorin entgeege,
denn kennt sy die Strooss ad acta leege
und sich drfir voll uff dä Schrott konzentriere,
wo dr Saner uns wott als Vision presentiere.

A propos dä Wirrkopf: me sott jo nit versuume
dä s nägscht Mool mitzgäh, wenn Basel duet ruume.

Dr Jögge lot jetz Schuggerfritze
us halb Europa ummeflitze.
Die sueche wild no Demonschtrante
doch finde sy laider nur Passante.

Die Lingge gryyden em Jögge druff aa
S haig z wenig Demonschtrante ka.

D Frau Herzog maint, das kenn me gly
ändere, wenn s miessi sy
me kennt doch mit däm gschänggte Gold
de Demonschtrante zahle en aagmässne Sold.