Denn Basel git sich gärn verschlosse
Drum het au s Volgg mit Mehr beschlosse:
D Läde blyybe besser zue,
so haig au s Personal sy Rueh.

Die bruuchts au zum dr Usgang gniesse;
nit z Oobe, nai do diemer schliesse.
Denn was dr Basler schampar mag,
das isch Kultur - doch nur am Daag.

Me isch drum au scho am studiere,
am plane und am konzipiere,
wie me am Daag e Füürwärgg macht,
wo bi Sunneschyn lychtet und nit numme gracht.

D Schmiir ka Dii jetzt, wenn Du hesch miesse
uffs Trottoir schiffe, diräggt biesse.
Und wenn de bättlisch, Dir d Buess z erloo,
kasch au fir das none Buess bykoo.

Dr Schild, dä het wie gwohnt gediige
dr hoch Olymp vom Sport bestiige.
Doch s Heggscht blybt ihm persee verwehrt,
will är nit ze de OLYMPER gheert.

Dr Hamatschu griegt bi de Bahne
scho glyy e greessere Wirbel aane.
Doch die, so het men ys verzellt,
hänn d Waiche ganz schnäll anderscht gstellt.

Dr Morin setzt sich wirgglig fescht
für alli y, wott numme s Bescht.
Drum dränggt s en fire z stoh und kiehn
z verkinde, ass mer no meh mien.

Zerscht bysse d Kampfhind, denn d Ärzt und zur Stund
isch s sicher, ass d Vogelgrippe grad au no kunnt.
Mir froogen ys do, wie dä Conti das macht,
ass dä immer no underem Schnauz fiire lacht.

Au dr Haafe kunnt noonig zer Rueh.
Deert luegt nach em Omlin dr Grisard drzue: au
dä duet sy aige Sippli nur koche
und dr Grossroot isch au däm uff e Lym uffe groche.

D Frau Herzog schrybbt e schwarzi Null
D SP jublet: d Schatulle isch full.
Au d FDP und d Basta dänggt,
ass s jetzt wider fir jede Bleedsinn länggt.

D Barbara, die setzt sich kiehl
zwische Bängg und Blastiggstiehl.
Lutt het dr Malama sich gwehrt
und sitzt jetzt trotzdäm sälber deert.